لماذا اخترتُ جراحات الفتاق؟
الموضوع بدأ من زمان لمّا كنت جرّاحاً صغيراً لسه بابتدي أول خطواتي في مهنة الجراحة. بدأت ألاحظ أن المرضى اللي بييجولنا بجراحة الفتاق مش بياخدوا الخدمة المطلوبة زي باقي المرضى — يمكن لأن معظمهم مش بيكون عنده ألم واضح أو حاجة تستدعي جراحة عاجلة، ولا المشكلة ورم يخافوا ينتشر.
علشان كده كان مريض الفتاق بياخد أقل اهتمام في القسم، وكانت عملياته بيعملها أي حد من أصغر دكتور لأكبر دكتور، يمكن لأن وقتها ما كانش في تقنيات كتير متاحة زي دلوقتي. النتيجة كانت أن نسبة المرضى اللي بيرجعلهم الفتاق كبيرة جداً، ومشاكل العمليات كتيرة.
كنت بشوف مرضى عاجزين بمعنى الكلمة — ناس عايشين بفتاق عملاق مخلّي حياتهم كلها جحيم. بدأت أدوّر وعرفت أن معظم الطرق اللي بنصلح بيها الفتاق في مصر والوطن العربي عفا عليها الزمن، وأن في طرق حديثة كتير بتدّي نتائج أحسن بكتير وبمضاعفات أقل.
استهواني الموضوع، وبدأت أقرأ وأتواصل مع ناس من أمريكا وإنجلترا وألمانيا والهند، شغلهم بس جراحات الفتاق — بيناموا ويصحوا علشان يطوّروا فيها. سافرتلهم وبدأت واحدة واحدة أتعلّم منهم وأنقل الطرق دي لمصر، ولحد دلوقتي في بينا تواصل دائم وكل يوم في جديد بحاول أنقله مباشرة لشغلي.
عمليات الفتاق بتعتمد على الجودة — في طرق الجراحة والتخدير، في اختيار أنواع الشبكات، في غرف عمليات معقّمة بجودة عالية. أي ضلع ينقص من أضلاع الجودة، أي تفصيلة صغيرة، ممكن تأثّر على النتيجة.
اللي حبّبني أكتر في المجال أن العمليات فيها مجال للإبداع في كل تفصيلة، وكل مريض بتتفصّل له العملية على مقاسه بالظبط. دلوقتي الحمد لله في مصر، حالات كانت معاقة بالفتاق رجعت تمارس حياتها طبيعي، وحالات رجع لها الفتاق ٣ و٤ و٥ مرات اتخلّصت من مشكلة كانت مؤرقاهم.
ومش بس الفتاق — المجال ده اسمه (Abdominal Core Surgery) أي جراحة عضلات المركز، وبيشمل جراحات الفتاق ومشاكل عضلات البطن وأورام جدار البطن والآلام المزمنة ومشاكل السرة وصعوبة إغلاق جدار البطن ومشاكل الكولوستومي. تخصص لأول مرة في الوطن العربي.
بفضل الله بقينا على خريطة العالم في المجال، وإن شاء الله خلال سنوات بسيطة هنكون بننافس بقوة ونمثّل العالم العربي كله. الشغف ده بيخليني دايماً أدوّر على الأحسن لمريضي، والحمد لله قدرت أحطّ أساس قوي لجراحات الفتاق وعضلات البطن في الوطن العربي — وأتمنى أنقله لجيل جديد من الجرّاحين في مصر والمنطقة.
